سرب المعاني تعلّت في السما طيوره .... وحلّت على ديرةٍ فيها الحيا زايـــد

ويوم الليالي تسائل عن سنا نوره .... أشرق عليهن بوجهه المصلح الرايــــد

الجـــود يهوي كفوفه طايعٍ شوره .... يعطي ومن عقب يعطى للعطى عايــد

أنهـــار عشرٍ جرت بالخير مذكوره .... ودارٍ بها انهار عشرٍ خيرها وايـــــد

شعبه هم أهله وماله في العرب جوره .... حامي حمى المجد عز الدولة القايد 

ما حس بالفقر شعبه مكرم أحضوره .... وياما شعوبٍ تلاهـــث حيلها بايـــــد

يا كم تمنّت عداة تـكــــون ماسوره .... عنده وتحظى بعـفـــوه لى لها فـايـــد

هل هو بشر أو بحر له م البشر صوره .... يا ذا الملك هو ملك في طيبه الزايد

الشمــس والبـــدر والأفلاك معذوره .... أنها تمنّى مكــانـــه حالهــــا كايــــد

في يـــوم عيده جميع الناس مسروره .... وكلٍّ لزايد بيوم الفرحـــــه ايعايــد