وجيت أمسح من أيامي جروح العاصفة والنار
وجيت أكتب على سطح الجليد أجمل عباراتي 

وجيت أجفف الدمعه وأواسي حرفي المنهار
واقول: اصمد .. ترى وحي القصيده حي ما ماتِ 

وجيت الملم الماضي بقلبي .. واحمله تذكار
وأنادي ع الزمان انظر أنا هذي معاناتي 

أنا ما عدت لدموع العواطف جفنها المدرار
ولا ذاك الحبيب اللي يشوف الدمع ويحاتي 

ولاني فارس أحلام القصيد .. وحسه المغوار
ولأني شاعر واعرف بعينك اكتب أبياتي 

أما ماني أنا .. ماني أنا .. يا حبي المحتار
أنا نفس الملامح باقيه .. بس انعكس ذاتي 

أنا من دمعة اليائس تعلمت الحياة اصرار
أنا من ضحكة الحالم عرفت اش قد مأساتي 

أنا أدري ما قدرت ألحق .. وصلت بآخر المشوار
ولكني قدرت أوقف بدرب الشوق خطواتي 

وألاقي ضحكتي بعد الفراق وغربة الأسفار
والبس معصمك حزني وعنقك عقد آهاتي 

واقول: أوطي على نار الحقيقه .. لو كوتك النار
ترى أرحم من حروق الجليد بفصلي الشاتي
 
 

عودة إلى صفحة قصائد الشاعر علي الخوار  -  اضغط هنا

 عودة إلى صفحة الشاعر علي الخوار  -  اضغط هنا